प्रधानमन्त्रीसँग भेटवार्ता: निर्वाचनमा जान प्रमुख राजनीतिक दलहरु तयार

काठमाडौं । सरकारले घोषणा गरेको फागुन २१ गतेको निर्वाचनमा सहभागी हुन प्रमुख राजनीतिक दलहरु तयार देखिएका छन् । शनिबार प्रधानमन्त्री सुशीला कार्कीले बालुवाटारमा बोलाएको बैठकमा प्रमुख तीन दलका शीर्ष नेताहरुले निर्वाचनमा जाने प्रतिबद्धता व्यक्त गर्नुभएको हो ।

बैठकपछि नेपाली कांग्रेसका सभापति एवं पूर्वप्रधानमन्त्री शेरबहादुर देउवाले सबै राजनीतिक दल चुनावमा जान तयार भएको बताउनुभयो । निर्वाचन भयरहित बनाउन सरकारले भरपर्दो सुरक्षाको वातावरण मिलाउनुपर्ने धारणा नेताहरूको रहेको छ । प्रधानमन्त्रीसँगको बैठकमा नेपाली कांग्रेसका सभापति शेरबहादुर देउवा, नेकपा एमालेका अध्यक्ष एवं पूर्वप्रधानमन्त्री केपी शर्मा ओली, नेपाली कम्युनिस्ट पार्टीका संयोजक पुष्पकमल दाहाल प्रचण्डले निर्वाचनमा सहभागी हुने प्रतिबद्धता व्यक्त गर्नुभएको बताइएको छ । वैठकमा सहज वातावरण बनेमा चुनावमा जानसकिने एमाले अध्यक्ष ओलीले समेत बताउनुभएको छ ।

प्रधानमन्त्रीसहित तीन दलका शीर्ष नेताहरूसँग बालुवाटारमा भएको छलफलपछि सञ्चारमन्त्री जगदीश खरेलले चुनावको वातावरण बनाउनको लागि पूर्वप्रधानमन्त्री ओलीको स्थान हद हटाउन सरकार तयार रहेको संकेत गर्नुभएको छ ।