गभर्नरको फेक ह्वाट्सएप एकाउन्ट मार्फत संवाद, सचेत रहन राष्ट्र बैंकको सबैमा अपिल !

काठमाडौं । गभर्नरको नाममा फेक ह्वाट्सएप एकाउन्ट बनाएर कुराकानी गरिरहेको पाइएपछि नेपाल राष्ट्र बैंकले सबैलाई सचेत गराएको छ । गभर्नर महाप्रसाद अधिकारीको नाम र तस्वीर दुरुपयोग गर्दै राष्ट्र बैंककै कर्मचारीसँग संवाद गरेको पाइएपछि साईबर ब्यूरोमा उजूरीसहित सचेत गराइएको हो ।

राष्ट्र बैंकका सहायक प्रवक्ता डा. डिल्लीराज पोख्रेलले बताउनुभयो ‘कर्मचारीहरुसँग त्यसरी कुराकानी गरेपछि उहाँहरुलाई पनि आशंका भयो । त्यसपछि हामीले तुरुन्तै प्रहरीको साइबर ब्यूरोमा पनि उजुरी दिएका छौं । राष्ट्र बैंकमा कर्मचारीसँग सम्वाद भएको भएपनि कुनै सूचनाको दुरुपयोग भने हुन पाएन । ’ राष्ट्र बैंकमा कार्यरत कर्मचारीसँग नै गभर्नर बनेर सम्वाद भएको विषय गम्भीर भएकोले साइबर ब्यूरोमा जानकारी गराइएको बताइएको छ ।

कर्मचारीसँग सम्वाद गर्नेले गभर्नर बनेर अरुसँग समेत संवाद गरेको हुनसक्नेतर्फ सबैलाई सजग गराउँदै त्यस्तो शंकास्पद गतिबिधिमा नलाग्न नफस्न भनिएको छ । यो बिषयलाई गभर्नर अधिकारी आफैले समेत गम्भिर रुपमा लिनुभएको छ ।