अष्ट्रेलिया १६ वर्षपछि फिफा विश्वकप फुटबलको नकआउट चरणमा !

एजेन्सी,काठमाडौं । अष्ट्रेलियाले १६ वर्षपछि फिफा विश्वकप फुटबलको अन्तिम १६ मा प्रवेश पाएको छ । कतारमा जारी फिफा विश्वकप २०२२ अन्तर्गत समू डी को अन्तिम खेलमा डेनमार्कलाई १–० ले पराजित गरेसँगै अष्ट्रेलियाले समूह डी मा उपविजेता बन्दै नकआउट चरणमा स्थान सुरक्षित गरेको हो

अल जानोब स्टेडियममा भएको खेलमा अष्ट्रेलियाका लागि म्याथ्यु लेकीले रिले म्याग्रेको पासमा खेलको ६०औं मिनेटमा गरेको गोल नै निर्णायक बन्यो । यसअघि अष्ट्रेलिया सन् २००६ मा जर्मनीमा भएको विश्वकपमा अन्तिम १६ मा पुगेको थियो । तर इटलीसँग पेनाल्टी गोलमा १–० ले पराजित हुँदै अष्ट्रेलिया बाहिरिएको थियो भने इटलीले नै उक्त विश्वकप जितेको थियो ।

जारी विश्वकपमा समूह डी मा अष्ट्रेलिया र साविक विजेता फ्रान्सले समान ६ अंक जोडेपनि गोलअन्तरमा फ्रान्स अघि रहेर समूह विजेता बनेको छ । पहिलो खेलमा फ्रान्ससँग ४–१ ले पारजित भएको अष्ट्रेलियाले ट्युनिसिया र डेनमार्कलाई पराजित गरेको थियो । अष्ट्रेलियाले अब समूह सी को विजेतासँग अन्तिम १६ मा खेल्नेछ ।