न्यु साउथ वेल्समा उच्च रेकर्ड बनाउँदै थपिए १०३४ कोरोना संक्रमित

ब्रिजबेन, अष्ट्रेलिया । न्यु साउथ वेल्समा अहिलेसम्मकै उच्च रेकर्ड बनाउँदै १ हजार ३४ जना कोरोना संक्रमित थपिएका छन् । स्वास्थ्य विभागका अनुसार पछिल्लो २४ घण्टामा १ लाख ५१ हजार २७२ जनाको पीसीआर परीक्षणका क्रममा १ हजार ३४ जनामा संक्रमण पुष्टि भएको हो ।

पछिल्लो २४ घण्टामा थपिएका कोरोना संक्रमितमध्ये ५ जना बाहिरी र १ हजार २९ जना स्थानीय रहेको बताइएको छ । अहिलेसम्म न्यु साउथ वेल्समा १ करोड २५ लाख ५३ हजार २५७ जनाको कोरोना परीक्षण मार्फत २१ हजार २ सय ८२ जनामा कोरोना संक्रमण पुष्टि भएको छ । पछिल्लो २४ घण्टामा न्यु साउथ वेल्समा कोरोना संक्रमणबाट थप ३ जनाको मृत्यु भएसँगै कोरोना संक्रमणबाट ज्यान गुमाउनेको संख्या १३५ पुगेको छ ।

यता, पछिल्लो २४ घण्टामा ५६ हजार २ सय ४८ जनाको पीसीआर परीक्षण गरिएको भिक्टोरियामा राज्यमा ८० जनामा कोरोना संक्रमण पुष्टि भएको छ । यी दुबै राज्यमा कोरोना संक्रमणले तिब्रता पाइरहँदा लामो समयदेखी नागरिक लकडाउनमा बस्न बाध्य भएका छन् ।

Pic : wikipedia