दक्षिण कोरियामा ट्यांकीभित्र पसेका नेपाली श्रमिकको मृत्यु

दक्षिण कोरियाको जेजुमा सुँगुर फार्मको फोहोर प्रशोधन गर्ने ट्यांकीमा फसेका सहकर्मीलाई उद्धार गर्न पसेका नेपाली श्रमिकको मृत्यु भएको छ।

ताप्लेजुङका ३२ वर्षीय विकास शेर्पाको उपचारका क्रममा मृत्यु भएको दक्षिण कोरियास्थित नेपाली दूतावासले जनाएको छ।

दूतावासका अनुसार शनिबार पानीमुनिको पम्प जाँच गर्न ट्यांकीमा पसेका भियतनामी श्रमिक समस्यामा परेका थिए। उनलाई उद्धार गर्न शेर्पा पनि ट्यांकीभित्र पसेका थिए।

उद्धार टोलीले दुवै जनालाई हृदयगति बन्द भएको अवस्थामा ट्यांकीबाट बाहिर निकालेको थियो। त्यसपछि अस्पताल पुर्‍याइएका दुवैको उपचारका क्रममा मृत्यु भएको हो।

घटनाबारे थप विवरण तथा दुर्घटनाको कारणबारे स्थानीय निकायले अनुसन्धान गरिरहेको जनाइएको छ।