सुरु भयो धमाका २०७९ अष्ट्रेलिया टूर, यी सात शहरमा भब्य सांस्कृतिक कार्यक्रम हुँदै

ब्रिजबेन, अष्ट्रेलिया । केविसी अष्ट्रेलियाको आयोजनामा अष्ट्रेलियाका विभिन्न सात शहरमा आयोजना हुन लागेको धमाका २०७९ अष्ट्रेलिया टूर २०७९ सुरु भएको छ । टूरमा चर्चित लोकदोहोरी गायक पशुपति शर्मा, गायिका रचना रिमाल, कमडियन सुवोध गौतम र दिपक आचार्य काकु सहभागी छन् ।

बिहीबार अर्थात २१ जुलाईमा पर्थ आईपुगेको यो टोलीले शुक्रबार (आज) होटल चाल्समा आफ्नो प्रस्तुति दिँएको छ । पर्थको कार्यक्रमलाई वी केयर नेपालले आयोजना गरेको छ । यस लगत्तै कमेडी र नेपाली मेलोडीको गज्जबको संयोजनसहितको यो टोलीले तास्मानियाको लन्चेष्टनमा आफ्नो प्रस्तुति दिनेछ । लन्चेष्टनको म्याक्स फ्राई हलमा हुने कार्यक्रमको सम्पूर्ण तयारी पूरा भइसकेको छ । कार्यक्रमलाई लिएर त्यहाँको नेपाली समूदायका साथै नेपालीभाषी भुटानी समूदाय पनि निकै उत्साही छन् । मुख्यत पशुपति शर्माको क्रेज नेपालीभाषीमाझ अत्यन्तै धेरै देखिन्छ । अर्कोतिर तीजको समेत रमझम सुरु हुन लागेका कारण रचना रिमाल पशुपति शर्माको जोडीको यो प्रस्तुतिलाई धेरैले प्रतिक्षा गरेका छन् । यसमा कमेडीको प्रस्तुतिले दर्शकहरुलाई मनोरञ्जन थप्ने अपेक्षा छ ।

ब्रिजबेनमा ३० जुलाई शनिबार भब्य सांगितिक कार्यक्रम हुने भएको छ । क्वीन्सल्याण्ड नेप्लीज कम्युनिटी सेन्टरको सहयोगार्थ हुन लागेको कार्यक्रममा समेत तीजका भाका, नेपाली मौलिक लोकदोहोरीको धुनका साथै नेपाली संगीतको आधुनिक आवाज समेत गन्जिने आयोजक केविसी अष्ट्रेलियाले जनाएको छ । अष्ट्रेलिया टूरको संयोजन समेत गरिरहेका केविसी अष्ट्रेलियाका निर्देशक चिरञ्जीवी देवकोटाले ब्रिसबेनको नेपाली समूदायको माया पहिलो पटक अष्ट्रेलिया भ्रमणमा रहेकी गायिका रचना रिमालले पाउने आशा व्यक्त गर्नुभयो । यस्तै पशुपति शर्मा लगायतका कलाकारहरुलाई यसअघि मिल्दै आएको साथ यस पटक पनि प्राप्त हुने अपेक्षा गरिएको छ । ब्रिसबेनमा हामीले सबै समूदाय एकै ठाउँमा आएर, एकताबद्ध भएर आफ्नै सामूदायिक केन्द्र बनाउने अभियानमा एउटै मात्र भएपनि ईंटा थपौं भन्ने उद्देश्यका साथ हातेमालो गरेका हौं । देबकोटाले भन्नुभयो ।

यसपछि मेलबर्नमा अगष्ट १ तारिख सोमबार गुल्मी समाज भिक्टोरिया, केइसी नेपाली समाज लगायतको आयोजनामा अकोना पार्क सेन्टरमा तीज धमाका २०७९ हुनेछ । मेलबर्नको पूर्वीक्षेत्रमा बसोबास गर्ने धेरै नेपालीको सहभागिता यसमा हुने अपेक्षा आयोजकको छ । यस लगत्तै नेपाली कलाकारहरुको टोलीले ४ तारिख क्यानबेरामा कन्सर्ट दिनेछ । डीबोइज ईभेन्टसको संयोजनमा अष्ट्रेलियाको राजधानी क्यानबेरामा तीज धमाका कार्यक्रम निःशुल्क प्रवेशको व्यवस्था गरिएको छ । पछिल्लो समय नेपालीको उपस्थिति बढ्दै जाँदा नेपाली कार्यक्रम पनि यहाँ बाक्लै भइरहेका छन् ।

यसपछि सिड्नीमा तीज मेला विथ कमेडी नाईट्स अगष्टको ६ तारिख शनिबार हुनेछ । फन्टाष्टिक ईभेन्ट सिड्नीको आयोजनामा यो कार्यक्रम ग्रानभिलस्थित हिमालयन प्यालेस हलमा हुनेछ । सिड्नीमा यो नै तीजको पहिलो भव्य कार्यक्रम बन्ने अपेक्षा गरिएको छ । यसपछि अगष्टको ८ तारिख सोमबार एडिलेडमा तीज धमाका २०७९ गरिनेछ । जसलाई गिरिश ईभेन्टसले संयोजन गरेको छ । डोम पोलिस्कि सेन्टरमा हुने कार्यक्रमसँगै धमाका २०७९ अष्ट्रेलिया टूर सम्पन्न हुनेछ ।

धमाका २०७९ अष्ट्रेलिया टूरलाई ग्रेस ईन्टरनेशनलले मुख्य प्रायोजन गरेको छ भने प्लाटिनम स्पोन्सरको रुपमा ब्लूबेरी रियल स्टेट मेलबर्न रहेको छ । विभिन्न शहरमा आयोजना हुने कार्यक्रमका लागि स्थानीयस्तरमा विभिन्न व्यवसायिक तथा गैरनाफामूलक संघसंस्थाहरु समेत जोडिएका छन् ।