बारा प्रिन्सिपल हत्या प्रकरण : पूर्व शिक्षिकासहित ६ जना प्रहरी खोरमा

काठमाडौं । बाराको कलैयास्थित बाल एकता इङ्गलिस बोर्डिङ स्कुलका प्रिन्सिपल रुपेश स्वर्णकारको गोली हानेर हत्या गरिएको घटनामा संलग्न रहेको आशंकामा तीन जना नेपाली र तीन जना भारतीय नागरिकलाई पक्राउ गरेर अनुसन्धान गरिरहेको बाराका प्रहरी प्रवक्ता डिएसपी दधिराम न्यौपानेले जानकारी दिनुभएको हो ।

पक्राउ परेकामध्ये एक जना सोही विद्यालयमा काम गर्ने पूर्वशिक्षिकासमेत हुनुहुन्छ । पक्राउ अभियुक्तको नाम भने प्रहरीले खुलाएको छैन । सोमबार दिउँसो दुई वटा मोटरसाइकल चढेर आएका चारजनाको समूहले स्वर्णकारमाथि गोली प्रहार गरेर भागेको थियो । टाउको र छातीमा गोली लागेर गम्भीर घाइते भएका स्वर्णकारको उपचारका क्रममा वीरगन्जस्थित बयोधा अस्पतालमा मृत्यु भएको थियो ।

आपसी सम्बन्ध र रिसिबीको कारण स्वर्णकारको हत्या भएको प्रहरीको प्रारम्भिक अनुमान गरेको छ । यो घटनाले सिंगो मधेस प्रदेशमा आतंक र त्रासदी बढाएको छ ।