सिड्नीमा एक नेपाली युवतीलाई कारले दियो ठक्कर, अवस्था चिन्ताजनक

सिड्नी/ सिड्नीको ग्रान्भिलमा कारले ठक्कर दिदा एक नेपाली विद्यार्थी युवती गम्भिर घाइते हुनुभएको छ । टाउकोमा गहिरो चोट लागेको घाइतेको वेष्टमिड अस्पतालमा उपचार भइरहेको न्यु साउथ वेल्स प्रहरीले जनाएको छ । मंगलबार बिहान ५ बजेतिर सडक पार गर्ने क्रममा तिब्र गतिमा आइरहेको कारले २१ वर्षिय सुष्मिता लामालाई ठक्कर दिएको हो । घटनास्थल पुगेको पारामेडिक्सले केही उपचार गरि अस्पताल लगेको थियो । कारका चालक ५३ वर्षिय पुरुष घाइते नभएपनि अनिवार्य स्वास्थ्य परिक्षण लागि अस्पताल लगिएको छ । घटनाको प्रहरीले अनुसन्धान गरिरहेको छ ।

एक महिना अघि मात्रै अष्ट्रेलिया आउनु भएकी सुष्मिता बिहानै काम जाने क्रममा दुर्घटना भएको हो । सुष्मिताको अवस्था बुझ्न अस्पतालमा उनलाई अष्ट्रेलिया आउन सहयोग गरेको हिमालयन वल्डवाइड एजुकेशन कन्सलटेन्सीकी प्रमुख रोशनी श्रेष्ठ र उनी अध्ययनरत अष्ट्रेलियन हार्बड इन्टरनेशनल केलजका शिक्षकहरु पुग्नुभएको छ । रोशनीले दिएको जानकारी अनुसार टाउकोमा चोट लागेका कारण सुष्मितालाई आंशिक पारालाइसिस समेत देखिएको छ । मंगलबार नै टाउकोको अप्रेसन भएको छ भने हाल उनको आइसियुमा उपचार भइरहेको छ ।

सुष्मिताको अभिभावकलाई बोलाउनका लागि आवश्यक तयारी भइरहेको समेत रोशनीले जानकारी दिनुभयो । काठमाडौंकी बासिन्दा सुष्मिता गत डिसेम्बर २१ तारिखमा डिप्लोमा इन अकाउन्टिङ्ग पढ्न सिड्नी आउनु भएको थियो ।