प्रहरीको रासनमा १५ प्रतिशत वृद्धी, राज्यकोषमा वार्षिक १ अर्व १७ करोडको दायित्व

काठमाडौं । नेपाल प्रहरी र सशस्त्र प्रहरीको रासन वृद्धि हुने भएको छ । १५ प्रतिशत रासन वृद्धि सम्बन्धी निर्णय लागू हुने भएको हो । प्रतिस्थापन विधेयकमार्फत बजेट व्यवस्था गर्नुभएका अर्थमन्त्री जनार्दन शर्माले सोमबार रासन वृद्धिसम्बन्धी फाइल सदर गर्नुभएको छ ।

यसअघि रासन वृद्धि घोषणा गरिएपनि आवश्यक पर्ने बजेट विनियोजन नगरिएकै कारण निर्णय कार्यान्वयन हुन सकेको थिएन । नेपाली प्रहरी र सशस्त्र प्रहरीका लागि नयाँ दररेट अनुसारको १५ प्रतिशत रासन वृद्धि गरेसँगै राज्य कोषमा वर्षमा १ अर्ब १७ करोड बराबरको दायित्व थप हुने देखिएको छ । पूर्ववर्ती सरकारले बजेट व्यवस्था नै नगरी रासन वृद्धिको सैद्धान्तिक घोषणा मात्र गर्दा प्रहरीमा असन्तुष्टि बढेको थियो ।

देउवा सरकारका अर्थमन्त्री शर्माले रासन बृद्धिको व्यवहारिक कार्यान्वयन थालेपछि प्रहरी संगठनका कर्मचारीहरु खुसी भएका छन् ।