अब संसद बैठकमा कालो चस्मा लगाएर उपस्थित नहुन आग्रह गरिएको छ।

बुधबार सभामुख डोलप्रसाद अर्यालले कार्यव्यवस्था परामर्श समिति बैठकमा सबै दलका प्रमुख सचेतक र सचेतकलाई आफ्ना सांसदहरूलाई संसद बैठकमा कालो चस्मा नलगाउन आग्रह गर्न अनुरोध गरेका हुन्।

संसद बैठकमा कालो चस्मा लगाएर उपस्थित हुने विषयमा केही समयदेखि प्रश्न उठ्दै आएको थियो।

कांग्रेसकी प्रमुख सचेतक बासना थापाले पनि संसदको मर्यादा कायम गर्न सांसदसँगै प्रधानमन्त्री र मन्त्रीहरूमा पनि समान मापदण्ड लागू हुनुपर्ने धारणा राख्दै आएकी थिइन्।

रास्वपाका सचेतक प्रकाशचन्द्र परियारका अनुसार संसदको गरिमा, अनुशासन र मर्यादा कायम गर्ने उद्देश्यले यस्तो आग्रह गरिएको हो।

बैठकमा सांसदहरूले संसदको लोगो लगाएर उपस्थित हुने, मर्यादित पोशाक लगाउने तथा बैठक चलिरहेका बेला लबीमा अनावश्यक रूपमा लामो समय नबस्ने विषयमा पनि छलफल भएको थियो।

हालसम्म यो औपचारिक कानुनी प्रतिबन्ध नभई संसदीय आचरण र मर्यादासम्बन्धी आग्रहका रूपमा आएको हो।

अब आगामी संसद बैठकहरूमा सांसद, मन्त्री तथा प्रधानमन्त्रीले यस आग्रहलाई कसरी कार्यान्वयन गर्छन् भन्ने विषयलाई चासोका साथ हेरिएको छ।